Tere Bina

Latest Song. Didn’t feel like singing it. Had a heavy heart.

Tere bina hi yaha din hoga,
Tere bina hi raat hogi.
Aayegi fir teri yaadein,
Jaane kab baat hogi.

Tu yaha thi to thodi si roshnai thi,
Jharokhe se hokar jaise tajalli aayi thi.
Teri muskurahte meri saans ban gayi
Meri bhookh goom hue meri pyaas kho gayi.
Tu yaha thi to zindagi paas aayi thi,
Aur hume usko jeene me aas aayi thi.

Ab tere bina hi hogi subah,
Tere bina hi shaam hogi.
Gili karvato ki mehfil me,
Aahe saaqi aur aahe hi jaam hogi.

Tu nahi hai to aankh meri bhar aayi hai
Aur meri zubaan pe woh baat fir aayi hai.
Tujhe paa lenge ya tujh pe mar jayenge,
Tere pyaar me hum hudd se guzar jayenge
Tu  nahi hai to mehfil me muflisi chhayi hai,
Aur aaj fir teri yaadein yaad aayi hai.

Ab tere bina hi yaha din hoga,
Tere bina hi raat hogi.

Mausam

Fir wahi mausam aaya hai chaukhat par,
Baarish kabhi patjhad meri chaukhat par.

Kal hi to tha ki tumhe chhod aaye the hum,
Ab nazar aati ho tum mujhe har karvat par.

Kachchi-pakki neend tire khwaab me doobi,
Aur dil machalta hai mera halki si aahat par.

Aaina hasta hai mire chehre ki lakeero pe,
Meri Muntziri ke nishaan hai salvat par.

[incomplete]

Ghazal ruk jayegi

Baat fir zubaan pe aake ruk jayegi,
Machli si nabz tujhe dekh ke ruk jayegi.

Parda hata to yeh shaam ruk jayegi,
Jo zulf udegi to fir bayar ruk jayegi.

Kya ilaaz hai batao chake-dil ka yaaron,
Chal ke aayegi woh ya abhi ruk jayegi.

Umeed hai ki sawan lautega bahut jald,
Aane se unke yeh patjhadi ruk jayegi.

Dard aur hai auro ke muhabbat ke siva,
Meri aahein fir meri palako pe ruk jayegi.

Ho gaya deedar hume saiyyar bazm ka,
Aur yeh ghazal bhi ab yahin ruk jayegi.